Xildhibaan Cabdirsaaq Jindi, oo ka tirsan Xubnaha Golaha Shacabka, ayaa ku dhaliilay Madaxweynaha Soomaaliya, Maxamed Cabdullaahi Farmaajo, iyo xukumaddiisa iney doonayaan in, sida uu hadalka u dhigay, ay been, booto iyo igu sawir ku maamulaan dalka, isaga oo taas wax lala yaabo ku tilmaamay.

Su’aal ahayd “dal dhan iyo ummad dhan malagu dhaqi karaa been, booto iyo igu sawir”? ayuu ciwaan uga dhigay dhigaal uu kusoo daabacay Xisaabtiisa Feysbuugga. Waxa uu xusay socdaalkii dhulka ahaa ee uu Madaxweyne Farmaajo ku soo maray Puntland iyo Galmudug, laakiin waxa uu isweydiiyey meesha uu Madaxweynuhu ka bixiyey  balan-qaadyadii uu u soo sameeyey shacabka iyo maamulada goboladaas.

“Wuxuu soo dhagax dhigay mashaariic aad u tira badan, laguna farxay markii uu dhagax dhigayay, laakin nasiib darro ma jiro hal mashruuc oo ilaa hadda la bilaabay” ayuu Xildhibaan Jindi ku yiri dhigaalkiisa. “Macnaheeda waa maxaay” su’aal ahaydna waa uu sii raaciyey hadalkiisa.

Xildhibaanku waxa uu Madaxweynaha ku dhaliilay in hab-dhaqankiisa siyaasadeed ay ugula muuqato sida inuusan dooneen inuu dib u hogaamiyo Soomaaliya mar kale, marka uu waqtigaasa ka dhamaado 2020-ka. “Mudane madaxweyne sida kaa muuqato raja kama qabtid in aad dib dambe isu soo sharaxdid, ee waxaan ku dhihi lahaa, fadlan, ummadda Soomaaliyeed u nax, nidaamkana wax ka badal” ayuu yiri Jindi.

LEAVE A REPLY

Please enter your comment!
Please enter your name here